ماں تئی چماں چم ءِ روک دیستگ
مئے وڑیں نوکجءَ گنوک دیستگ
کتگ پہ زانت سر وتی ظاھر
تئی دستءَ من وھدے ڈوک دیستگ
کپتگاں ترانگءَ پادیگءِ
آزمانءَ من زیک نوک دیستگ
جلگ دروگے منی یلاں مرچی
من وتی منزلءِ بروک دیستگ
پچ نہ ترّاں کہ زندءَ من بازیں
شرّیں کاراں ھراب کنوک دیستگ
تئی نہ تورانت بہ گوش کہ ماں دوستاں
دیم پہ دیمءَ شگان جنوک دیستگ
بست کتگ وابءَ اے دلءَ دوشی
طائرؔ کاڑانی من سروک دیستگ