مستانی، ملار، جزگ ءَ انت
کونجانی قطار، جزگ ءَ انت
کیف انت کہ زرانت، تئی قدّحیں چمّ
توئے کہ خمار، جزگ ءَ انت
اے چونیں زمانہ، چونیں عہدے
مہر ءَ چہ میار، جزگ ءَ انت
درفشان انت تئی انارک ءِ بام
ماہکانی ءِ شار، جزگ ءَ انت
مستاگ ترا منی زمین جمب
کوہ ءَ چہ تلار، جزگ ءَ انت
گندوکی ءِ واب من نہ گنداں
وہد ءَ چہ ودار، جزگ ءَ انت
نوکاپی ءِ واہگاں! پہ جلت
ہار ءَ گوں پتار، جزگ ءَ انت
حانیؔ ءِ کُلہ پہ شہ مُرید ءَ
نیں چاکر ءِ وار، جزگ ءَ انت
ہے ہے اے زمانہ سازیں دُنیا
ہے ہے کہ، دوار، جزگ ءَ انت
شہدادؔ بہ بیت کہ من عطاشادؔ
مہناز ءِ کمار، جزگ ءَ انت