مئے زیارت ءُ پیراں ماندارئے چے پشت کپیت
مئے مھتر ءُ میراں ماندارئے چے پشت کپیت
مئے کوہ مراد ءَ بمبانی آماچ کنئے
مئے بر ءِ کھیراں ماندارئے چے پشت کپیت
اے دل گوں تئی یاتانی امیتاں گلباگ انت
اے زرد ءَ زھیراں ماندارئے چے پشت کپیت
پشت کپت تئی مھرانی بدل کشکانی تہءَ
دلسندیں لکیراں ماندارئے چے پشت کپیت
تئی آمڑ ءُ پناں سد بر من ھیرات بباں
تو پوپل ءُ ھیراں ماندارئے چے پشت کپیت
بے اُمریں پشنگاں بل گوں جبین ءَ تران کن انت
پشت کپتگیں تیراں ماندارئے چے پشت کپیت
تئی مال ءُ متاہ دو لبز بلوچی رھبند ءَ
قاضی وتی گیراں ماندارئے چے پشت کپیت