مہر ءِ چاگردی ءِ رہبند و وفا یلہ داتگش
بیرگ ءَ ناسرپد اَنت چہ وت، وتا یلہ داتگش
بیائے تپاسّیں مروچی رہبرانی کار پداں
وت کُجام جاہ ءَ سر اَنت مارا کُجا یلہ داتگش
زیت پہ اے بدبختیں بیماراں کنت قبراں تیار
آسر ءَ تائید و بندانی، دوا یلہ داتگش
پہ ہمایاں بندگ ءَ انت روچے نوکیں کعبہ ئے
کہ بُتانی دوستی ءَ پاکیں حدا یلہ داتگش
حاکم و سیت واریں زرداران ودین ءِ عالماں
”زند وُ جنّت“ پہ وتا، دوزح پہ مَا یلہ داتگش
غم مزار بیم اَنت و درد چو رستر ءَ انت ہرگور ءَ
مرچی تہنا ءَ لد ءَ زند ءِ ترا یلہ داتگش
تُرندیں چیہالے گشے گوشاں کپاں انت ساحرؔ ءِ
چَک جن اِت بیلا ں کسے پشتءَ پدا یلہ داتگش