مِھر ءِ زِبَھریں جَنت ءَ!!
مِھرے زِبَھریں جَنت ءَ!
امروز ءِ روکیں آچش ءَ
دائِم سُچ ایت گَرمیں جَس ءَ
مُروارِدؔ اِنت بِے مانگ اِنت ، بِے مُزرو اِنت نِیادی زِھاں
مُروارِد ؔ اِنت بِے مَردُم ءَ بِے دَزرس ءُ بِے مَنزل اِنت!
باریں چِے سُوک ءَ زندگ اِنت ؟
دَرداں دِل ءِ پُژمُردگ اِنت،
رِؤک اِنت گَمانی آچِش ءَ!!
تَرْامپّول وَارت ، کُوچِنڈگیں!
چَار دَست ءُ پَادی گَردگیں !
روچاں گھیں گوازینَگیں،
ھَروچ وَتی دَرداں مِر ایت،
بَچّانی سُوزاں گیمُر ایت،
بَچّ بِے سَر ءُ بِے پادگ اَنت
زَانتی زِھاں تئیل کَپتگ اَنت
سَرمَجگی ، ھُورْدگ ریتکگ اَنت
ھَردیں کِہ واب ءَ بُست کَنت !!
اَرساں گُلاٹ ایت گُلگُل ءَ
دَستاں زِمین ءَ سَک کنت !
سُوزیں دِلے اَلھان کَنت ، دَرداں گوں شاھیں کادرءَ
پاکیں ھُدا زُتاں بِہ کُش مارا چَہ دَرد ءِ آچش ءَ
مارا پہ چی زندگ کُتگ
امروز ءِ کَلپیں نوبت ءَ
زُوت کَن مَن ءَ بِےآھِر ءَ
امروز ءِ گَٹّ ءَ پارْ کن،
جی مھربانیں ذات ءُ پاک !!
مَن گوں گَریبی باتن ءَ چِے گَندگی پَرتو کُتَگ ؟
یاکئِی بَھاریں کِیلگ ءِ پَرماش ءُ ماش من وارتگ اَنت
ماں زندگی ءِ مَلپد ءَ
بِے دَزرس بِے وارس اِنت!
گیراں نہ مَنتگ گِلہ ءِ
بِے بَھت ءُ ما بِے تالھہ اِنت
بِے مُجَتی ڈؤکالی اِنت
او اَنچوش اَنت امروز ءِ دَاب!!
بِے توکل انت اُمبرے رباب،
سُوماری ءِ بینٹ سُرمگیں ، تامُوری اَنت اَندیم کُتگ
ڈَنڈو گوں شاھی مَلپداں ،ویراندہ اِنت شینزار کَنت
میرؔ اَبدُلؔ ءِ جُست ءَ مَہ کَن!
اَندیم کُتَگ وَھدے مُج اَنت!
جَل شَنکین ءَ کَنڈَے پَچّ اِنت
ھَارْ ءَبدَاھَکّے ءِ کَشِیتگ!
بَشام ءُ ھَارونی بُگاں نَہ ھاک مَنتگ ناکہ جَس !
میر وَشدلؔ ءِ مَچّی شُتَگ ، ناہ ءَ نہ تاپ ایت ءِ چُوروؔ!
بَس پَہ گُمان ءَ زِندَگ اَنت ، اَھدانی چیدَگ بَستَگیں،
وَھد ءَ کَسی آجت نہ اِنت
دُنیا دَگا بازیں جَن ئِے!
کَس ءَ نہ بَند ایت پانُچلاں !
مَرشی کِہ ما باھَند کُتگ بَاندا نہ مانیں کُوڈواں
بَس پَہ وَتی ساڈینگ ءَ نِیادیں زِرّ ءَ اوژناگ کَنیں!
تَو اوں وتی راہ ءَ رَو ئِے، مَن اوں وَتی راہ ءَ روان!
مَن اوں وتی راہ ءَ روان !