میر ءُ سرداری ءَ یلہ مَدی اِت
سِلّ ءِ بیماری ءَ یلہ مَدی اِت
کار مَبند اِت اِے پنجگ ءُ باسکاں
گئیر ءِ چمداری ءَ یلہ مَدی اِت
ماں اُولس مُچّیان ءُ دیواناں
حُشکیں پیتّاری ءَ یلہ مَدی اِت
بَزگر ءُ مُزدگِر ءِ شُد آماچیں
زند ءِ پُرس داری ءَ یلہ مَدی اِت
داں وس ءُ واکے ھست شمے جان ءَ
برات ءِ حون واری ءَ یلہ مَدی اِت
گریشگ ءَ زندمان ءِ مات کِشک ءَ
کُوریں رھچاری ءَ یلہ مَدی اِت
دانکہ راج ءِ سر آتکگ ھُنڈالے
دُژمن ءِ یاری ءَ یلہ مَدی اِت
چرس ءُ تریاق، ھِیروئن، تُرندآپ
ایشاں پہ گاری ءَ یلہ مَدی اِت
سَر نہ بیت دانکہ کندی ءَ قبر ءِ
موت ءِ بیپاری ءَ یلہ مَدی اِت
عرض کنت ساحرؔ گوں وتی بیلاں
بِھ شُد ءُ واری ءَ یلہ مَدی اِت