رهگوزیءَ را وتی راهگُزر چارگی انت
سِنگ باریں چہ کُجا کئیت بلے سَر چارگی انت
چاراں تو چوں منءَ بے خنجر و کاٹار کشئے
منءَ تئی قاتلیں چمانی هُنر چارگی انت
باریں گُڈیت چے پیما اے شتنگیں درچکاں
دستگءِ هال چو کرزءَ انت تپر چارگی انت
قاصدءَ بس منءَ دو لَبز زبانی گُشتگ
چے گُشیت دوست منءَ وت اے هبر چارگی انت
اِدا ایر انت منی بُن پیرُکءِ پادانی نِشان
بلئے کمپان چو قبرءَ انت قبر چارگی انت
بلئے قاضی یک گترانگے مئے نسیبءَ مکپیت
چے وڈا لَٹّ ماں سرءَ وارت کنر چارگی انت
تو کہ دَلمانگ ئے سنگءَ گوں سرءَ میڈین ئے
گُڈا هچ چیز، نہ دیوار، نہ در، چارگی انت
َزندگیءَ منءَ پجینتگ وتی جندءِ گؤرء
ترا باریں پہ کجا بارت سپر چارگی انت