او! کرن ءِ نوکیں نوبت ءِ
پیڑآپ ءِ اَرساں شُشتگیں
مُدام نُگرہ دْرنزیں ماھکان
شدْر شانکیں مِھر ءِ کلکشان
اَلماس رَنگیں ھَتّلی
آتارگ ءِ پوش ءِ تہ ءَ
شاھپْراھگ ءِ بامگْواہ ءِ رُژن
گوں پَرپُکیں لُنٹاں وتی
گوں اَجگیں انارکاں بوسکی ئیں
او! “بچکند” بامسار ءِ پہ تو
ما دیریں ودار ءَ نِشتگیں
چہ گنج ءِ دَر ءَ ھاوند ئیگ ءَ
گْواچی یے بْیار گوں دِل تَبیں
مِستاگے پہ راج ءَ مئے
کہ کد بارِیگ مئے پِرتَرّ کنت
دَور چِلّگ ءِ کد پِر کپ اِیت
کد ھَتَم ءِ شَبُندگْواریں دْردے
کوھِنگ ءِ کوھسار ءَ شَل اِیت
زُلم ءِ تھاریں شپ گْوزاِیت
آجوئی ءِ بامے بَل اِیت
پمّا گُلیں بانداتے کیت
دَھر ءِ زِر ءِ ھَر مولُم ءَ
نازینک ءُ ھالو زَنزَر اَنت
چِیھال چَولانی گْوش اَنت
دَھڑی ءِ کوٹ ءُ بانڈَم ءُ
آپریچ ءَ ھور ءِ ھَر گْور ءَ
مِیر حمّل ءِ ارواہ ءِ پَد
انگت ودی اَنت کلمت ءَ
مِیر کمبر ءِ سِبزیں سَگار
اَنگت پُتینکاں بیت شُمے
روچے زَلُور کیت کمبریے
سَبزیں سَگار ءَ زاگ کنت
مُلتان ءِ آتراپ ءَ بچار
مِیر چاکر ءِ دْروشم بَل اَنت
پیداک دوبَر بیت گِیدرے
چَنّو ءُ باجُواں ڈَل اِیت
مانش ءَ بلوچ خان گوں یَلاں
گوکپُروش ءَ انگت زِندگ اِنت
گوں نُھ کُنگُریں بیلاں وتی
نوروز خان بیران نہ اِنت
کوھلو ءَ اکبر بُوت شھید
نام ئِے نمیران کُت وتی
راجدپتر ءِ رُژن ءِ تہ ءَ
بُوت مُجّتی داں مَھشر ءَ
اِے کوچ ءُ بلوچ ءِ پُسّگ اَنت
کوروش ءِ مَٹّ ءُ دَروَر اَنت
میڑ ءِ پِڑ ءَ ھرچ جاوَر ءَ
ایرجیگ جمّارا نہ بنت
زوراک ءِ زُلم ءِ تْرندی ءَ
نہ کہ پْرش اَنت نہ گار بنت
نوشیروان ءَ چہ بِگر
تا ھَستیں دَور ءِ کانڈَساں
پُسّگ بلوچستان ءِ مُدام
بَندیگ کُت ءُ جولاں جَت اَنت
سَر سِستگ ءُ جون گار کُت اَنت
زالِم شُت اَنت چہ ایشتم ءَ
نام ءُ نِشان اِش پَش نہ کپت
بلے انگت بلوچ راج زِندگ اِنت
دَینکار ءَ گوں ماں بَندگ اِنت
اے ریدگیں ریز اَنت مجید
اِے آس ءِ بُنگش ءِ سَنکل اَنت
سِندگ نہ بنت گوں زالِماں
زِرد اِش اجیر اِنت دائم ءَ
کریاباں پاوان کن اَنت
آجو بلوچستان ءَ کن اَنت
گالانی بِزانت:
دَھڑی ءِ کوٹ۔ میر حمّل ءِ کلات، ھَنکین ءُ مِنِندجاہ
زَھم ءِ زاگ کنگ۔ زَھم ءِ سجّگ ءُ آپدار کنگ
ریدگیں ریز۔ مُھر ءُ مُھکمیں ساد
اَجیر۔ مُشکل ءُ سکّیانی سگّوک
پاوان۔ سگّگ
کانڈس۔ کم زات
بُنگِش۔ بُنگیج، اول سَر