کوکر نُگرھیں مانشان انت
رُمب اِیت چہ زر ءَ سارتیں کَوش
شنز اَنت جمبر ءُ لنجیں جُڑ
سارت ءُ تونگلیں مُروارِد
ھمبل تو من ءَ یات کائے
مئے مُلک ءِ بُگ ءُ سبزیں گواش
بینگ پُرّ بنت آپ داریں
تَلّ ءُ کاہ چَراں سندانی
آسکل شنگ بنت گیابانی
ھانلؔ سمجھ اَنت دابانی
ھمبل تو من ءَ یات کائے
کُلیں کاپَر ءِ شاگیں تھت
دائم ترانگ ءَ مھر ءِ دَنت
سند انت ماض مُج ءَ یاتانی
کوھنیں ترانگاں پریچ اَنت
ھمبل تو من ءَ یات کائے
بانگواہ ءِ لُڑیں نمبی پان
ماھکانیں شپانی ساچان
شھد ءُ شکّلیں تئی دیوان
وھدے کہ من ءَ اومان بنت
جیڑاں گوستگیں اَھوالاں
ھمبل تو من ءَ یات کائے
اِمروز ءِ گِھیں بازار ءَ
وائم ھمسریں بیلانی
شھد ءُ شکّلیں شئیرانی
دیوان ءُ گُلیں مُچّی بنت
ترانگ تئی من ءَ گیرکار اَنت
ھمبل تو من ءَ یات کائے
تران ءَ رپتگیں دوستانی،
زندوں سِستگیں دستونک اِنت
بے اُمریں سیدؔ زھیراں تئی
زھروکے مجیدؔ اومان کنت
مشکل توپد ءَ نی بیائے
ھمبل تو من ءَ یات کائے