سرگوات ملاریں بِچکندے، نودانی سباہاں ایر رِتکہ
یک عمرے زھیراں گْوازینتہ، یک ارسے نگاہان ایر رِتکہ
لنٹانی سَہاریں گیابان ءَ کوکویں ھیالے بوسہ دنت
تئی مہر تَڑانی نوکاپے، سنگرتگیں راھاں ایر رِتکہ
برے کوھاں کروجیت میتگ کنت برے شہر ءَ جنگل سینگاریت
یک مست ءُ ملنگیں بے ھبرے ، لبزانی ستاہاں ایر رِتکہ
تئی مہر ءِ زرابیں باھنداں ، دریائیں ھَوسّے بادینتہ
یک تْرمپے سواباں آپ کُتہ ، یک تْرمپے گناہاں ایر رِتکہ
تہنائی ءِ ھُورکیں امروز ءَ ویرانیں کُدوہے ھیسکاریت
شپ دْرنگیں زھیرے درچکانی دل سستگیں شاہاں ایر رِتکہ
ارمان تئی کوھساریں دِل ءَ ھوشام ءِ سپر اوشتات نہ کنت
بُنگپتگیں ارس ءِ مومیں گَم ، ارواہ ءِ پناہاں ایر رِتکہ