شپ ودار ءِ ٹیٹلیں بانوری داباں پَچگِراں
زِرد ءِ تاہیر ءَ برنت، چمانی واباں پَچگِراں
مئے مُراد ءِ دوزہ ءَ پہ ہور گوٛاریت دائم ءَ
واہگانی جنّت ءِ اجگیں ءُ گُلاباں پَچگِراں
تو منی پہکیں دِل ءِ گنجیں مُراداں دَز بگِر
من تئی اَجگیں دل ءِ درٛاہیں عذاباں پَچگِراں
تئی خماریں دیدگانی نیم چمی چارگے
شاعر ءِ دست ءِ دل ءِ تاس ءِ شراباں پَچگِراں
پرچیا ممتاز لال ءِ کُل دَپ ءِ ماہیں جنک
چہ منا ورنائی ءِ داد ءُ حساباں پَچگِراں