تئی ترانگاں چہ رند شرابانی بلورءَ
دنیا ما کتگ بند شرابانی بلورءَ
نیمون مئے ہمیش انت ترا شعراں بہ بنداں
بیا ساہتے بچکند شرابانی بلورءَ
چو چورہیں چک یے ءَ وتی ماتوءِ ترسءَ
مئے ارس بنت اووند شرابانی بلورءَ
کئے عکسءَ وتی گندیت آدینکءَ سماءِ
ماہکانءَ جتگ پند شرابانی بلورءَ
تئی مہراں منی واہگءِ بستار گرفتار
ورنائی ابد بند شرابانی بلورءَ
چماں مئے حدا رنگیں مُلوری یے نصیب اِنت
روک انت گشئے دلبند شرابانی بلورءَ
عیدؔ فکرءَ درا کن وتی شعرانی زبانءَ
مئے زندگی پابند شرابانی بلورءَ