تراولے پاد بیت
رنگ دیوالءِ دیما رِچ اَنت
آگھیں دیدگانی کُدیت کِسہے
ماھ رژنائی ءِ دردان چَنکاں کنت
ھون پیژارتگیں جونے ھاکاں ھوار
درد نازُرکیں جانءَ تِجاں
ھاک ءِ جُنزا رواناں منزلئے
کودکیں واھگانی بدن گیمُرنت
جنّت ایں گُلبدن آس سنگار کنت
ما وتءَ کِسہانی نگاھاں ندات
انچو انچو روان گوں وتءَ زندگی
دِیستگیں مردُمانی ھبر گار باں
زندگیں زانگانی سپر گار باں
ھر کس گوں وت
وتی ڈولا سنگار بیت
تو کئے آ کئے اِنت من کَیاں
کس نزانت
بھر ءُ بانگیں زمین ءِ پھازوک چیا
پیسرئے کِسہاں وانگءَ انت مُدام
جاک کنت من ملامت نھاں
رتکگیں ھون ءِ سوگند گون انت ترا
کپتگیں مردُم ءِ جون گون انت ترا
سنگت ئِے سنگتی ئے ھوں گون انت ترا
درد بیت دوستءُ دُژمن یکیں سِرپءَ
مات بچّانی راھان نچاران وتی
پت ودارا نہ انت بابلءِ
برات جُستءَ نہ کنت واجوئے
گُھار پُرسءَ ندار اَنت کمبرئے
چاکرءِ کپتگین تُنگیں
جونءِ کِسّہ نبیت
اکرمءِ داشتگیں
دلبندءِ تیرانی جوابءَ بدئے
زاکرءِ ماتءِ ارسانی گارین جواب
مے مریدیں رضا نزانتگ ترا
زاھدءِ جُست ایر انت مُدام گوں وتءَ
بیا کہ عکسانی دلبند گیشینتگاں
تو وتی ھاترا من وتی ھاترا
بیا وتا ءُ منارا نوں ھمراھ بکن
بس انت سوداگری
جندئے براتءِ کُشگ
تو ھوں زانئے کہ رنگانی سنگار کُجین
تو ھون زانئے کہ براتانی دیوان کُجیں
ھمبلاں مھرئے مُریدین ھمسفر
دیدگاں ھر دوئیں یکیں رنگءَ بچار
رنگ دیوال ءِ دیما نہ بیت ھچبرا
پاد تراول نہ بنت مادرئے