وتی بولی

تو ھلکے لاڈُکین ماھیں پریءِ

تو دُرستین ترانگانی سومریءِ

تو بانداتے منی روکین چراگءِ

تو بلکین زندگی چہ وت شمُشتگ

تو بلکین آ گھی لبزان نزانئے

بلوچین زھگیءِ کِسّہ روان انت

عجب بے ترانگاں بازارے مردُم

وتی شوھازگءَ جِندءَ شموشاں

ھما کہ زی منی بانداتے روکاں

ھما پہ نانیءَ مرچی گنوکاں

کئ شھزانتیں گپّانءَ گوشاں من

بشوھازت ھما کِردانی ھاکاں

بسنگارت وتی ڈولءَ وتارا

زمانگ مَٹ کنت رنگاں بھارین

اے چمّان دیستگین مھرانی بولی

وتی بولی ءَ پرچہ اے شموشاں

درآمد کینگانی آسءَ روک کنت

من چِنچو بیوساں گندے زمانگ

وتی جندے نگاھاں بستگان من

درآمد بولیئے رازاں بران انت

تماشا زندگی چے چے بکنتیں

وتی جندے ذبانءَ بے ذباناں

ترا واناں وتی جندا نزاناں

گُلامی نالتین زندے رُدانیں

چہ ھاک دور ھرکس ھوں بواں انت

شَموشنت ڈیھے گُلزاریں بھاران

شموشنت رسمءُ دودانی تواران

گُڈا مانے نہ مانے کِسّہاں تو

اے چونیں بے تواریں زندگی ئے

وتی جندے ذبانءَ مان نیاریں