تَرا کہ جھیڑاں
گمان بیت کہ منی نگاھاں ھُدا ءِ دِست اِنت سمارگ ءَ اِنت
زمین ءَ زیبائیں چادری ءَ وتا پتاتہ
ءُ آزمان جلواناکیں چو تئی گُشان ءِ پیما
ترا من گِنداں
تو ساھ بکشان ءِ آزمان ءُ زمین ءِ میان ءِ تمامیں چیزاں
ریچان اِنت چہ تئی جبین ءَ زیبائی ترنپ ترنپ ءَ
تلاھیں بالاد چماں ھیرات بکشگ ءَ اِنت
گلاب چونسان اَنت رنگ چی تئی گشان ءِ دوچاں
تئی لُنٹ ءِ تام ءَ چہ تام پِنڈان اَنت پُل ءُ پاتو
تئی پاد شودان اَنت کِشک ءِ پولنگ ءُ جَنڈیں شال ءَ
تو کندگاے ءُ چہ تئی بچکند ءَ زندگی ءِ ھزار معنا در آھگ ءَ اِنت
من لوٹگایاں کہ وھد بوشتیت
چہ تئی جبین ءَ ریچوکیں آپاں من مُچ بکناں
پہ چماں ھیرات ءِ ونڈے بگراں
چہ تئی گُشان ءَ بلوٹاں سَنج ءِ پہ آزمان ءَ
چو پُلاں پنڈوک بہ باں تئی لُنٹانی تام ءِ لوٹ ءَ
من جیڑگایاں
کہ چہ تئی بچکند ءَ چنچوک معنا بزیراں پہ وت
بَلے اناگاھ
ھمے دمان ءَ منارا کَس ئی توار چہ تئی گمان ءَ کَشیت
ءُ اِش کناں من
ابیتکیں پیر زالے گریوگ ءَ اِنت
سمارگ اِنت منی سرین ءَ منارا کَسے
ھُدا ءِ دِست اِنت؟
ھُدا ءِ دِست ءِ سمار ءِ مارشت ءَ پجاھ کاراں
ھُدا ءِ دَست ءَ ابیتک ءُ ھورکیں لکیر پِر نیست
اے دَست کرنانی ٹپ ءُ ٹورانی داستاناں چہ آشنا اِنت
من اے دمان ءَ گُڈاں چہ واب ءَ
تہ اِش کناں کہ پدا مروچی بلوچیں بِچ ءِ دَراتکہ لوگ ءَ نہ بیتہ واتر
اے ھال شِنگ اِنت کہ نوک آؤکیں مردمانی سلاھ بِندیں یک موٹلی ءَ بَچکے بُرتہ
من بُرتگیں مردمانی کیمپ ءَ یک پیرزالی توار اِش کُت
آ گریوگ ءَ اَت
گوں چَلیں دَستاں لتارگ ءَ اَت یک کوھنیں اکس ئے
اے اکس کئی اِنت؟
من بُرز بَروتیں بلوچے جُست کُت
اے بُرز بروتیں بلوچیں برات ءَ دپ ءَ چہ دُھتانی پُورے یل دات
چَلنڈینت دستانی روکیں سِگریٹ
منارا چاریت
پدا گوں بُرزیں تواری ءَ گُشت
"اے پیر زالے جوانیں بچ ئے درامداں گوں میڈان مُرتہ
ءُ یک بَچ ئے درامدانی سیاداں بُرتہ"
ترا کہ جھیڑاں
گمان بیت کہ منی نگاھاں یک پیریں دَست ءِ سمارگ ءَ اِنت
ءُ دَست کرنانی ٹپ ءُ ٹورانی دَاستاناں چہ آشنا اِنت