زنزرانت زنزرانت جان ءُ ساہ زنزر انت
زلفءِ نودءِ سیاہگءَ کج نگاہ زنزر انت
ایررتکگاں کجا نود ءُ کوش ءُ کلکشان
مہلبانی بوہ زرانت مئے صباہ زنزر انت
دور گسر کپان اِنت مئے ہمسفر پہ منزلءَ
دانکہ ہوش کنت منءَ سال ءُ مَاہ زنزر انت
درد ءُ اندوہاں منءَ لاڑکی پہ گورجتگ
دلبرانی غم مریت دل پہ آہ زنزر انت
عاشقانی ہر تماہ مہکجانی بوسگ ئے
میتگانی میڑہءَ جاہ پہ جاہ زنزر انت
چونیں بدنصیبی یے کاسگءَ فقیری ئے
مہرءِ شہدءِ لذتءَ بادشاہ زنزر انت
کیفءِ موسمے گشئے چاڑ دیان اِنت واہگاں
دل مُلوریں شاعرے جیگ پہ براہ زنزر انت
عمرءِ قصہ انت عیدؔ بلءِ رامگیں کپوت
گندگءَ ہمائیءِ روح ءُ ساہ زنزر انت