ذاتءِ غارءَ بستگیں ذُریاتءِ تنداں در نہ کپت
انگت انسان رستری چہ راہءُ رنداں در نہ کپت
انگت فکرءِ شہار کوتاہ ، انگت بیگار زانت ءِ مجگ
انگت زند چہ کوہنیں دودءِ قید ءُ بنداں در نہ کپت
مہرءِ ارواہ جول جتیں مئے پُروشیت تُنّءَ واہگءِ
زند بکشیں چوشیں موجے درد ءِ شنداں در نہ کپت
ذرد کریاب قرن گوستنت زندءَ گواہی ہچ نہ دات
مہر ءِ بانُک واہگانی ہلک ءَ کنداں در نہ کپت
زندگی بدرنگیاں مئے براہ بہ بکشیت آبُروئیں
چوشیں دروشم ءُ لقاہے چہ مئے بنداں در نہ کپت
چہ ازل ما لڈ ءُ باریں سر جنانیں در پہ در
راہے بُرّیں راہے درکئیت ، زند چہ پنداں در نہ کپت
زند ءِ درد ءَ چوں کمائے شاعری گالاں عیؔد
دل وا تنی چہ ٹیٹلانی باؤبنداں در نہ کپت