زلف شنگنت مہوشانی یا کہ تابے پر رچیت
ترانگانی کوچگءَ تہنائیءِ جمبر رچیت
نود شنزنت ہر رگامءِ موسمءَ وشبو شل انت
چہ تئی ٹہلانی توپانءَ گشئے عنبر رچیت
نیّتءَ زانتیں جہانءِ چہ وتی لاچاریءَ
بے سما ناچیت جنک یے چنچو سیم ءُ زر رچیت
جی کپوتی کوکوے،کبگی رواج یے زیب دنت
شانتلے لڈیت چنالانی بنءَ شنگر رچیت
دیدگانی ہر نگاہءِ چست ءُ ایرءَ گون بیت
واہگءِ قدح چلکیت سنگریت ءُ سر رچیت
ہو منی چپیں کشءَ قہرانی ترونگل ریتکگاں
تو منی راستیں کشءَ بیا سر شپاں گوہر رچیت
آس اتگ بامءَ زمانگ پدر انت چماں عیدؔ
پہ ترا نودانی شنزے پہ منءَ انگر رچیت