ستک ءُ یقین ءَ یک بکن اللہ چہ درستاں مستر اِنت
امبروزءِ زنگ ءَ دوست مجن اللہ چہ درستاں مستر اِنت
ملگور بزیں پچ بوتگ انت، زلف ریِتکگاں رَکّ ءِ سرا
برپانی بازار ءَ دل ءِ آس لگ اتگ سہب ءِ سرا
انجیر ءِ تاکاں دزمجن اللہ چہ درستاں مستر انت
تل بستگیں لنٹانی گم، دانکے درئیت اِنت اہوت ءَ
اے گپ ءَ ہرجاہ من گشاں گاراں تئی من محبت ءَ
باور بکن نگرہ بدن اللہ چہ درستاں مستر انت
پیشانی ءِ نور ءَ تئی استال ءُ ماہ وازمندگاں
پلانی وشبو ءِ تہا گنداں تئی بچکندگاں
مہر ءِ بہشت رنگیں چمن اللہ چہ درستاں مستر انِت
امبروز ءِ یاتانی تہا یک شکّلیں تو یات ئیے
حرچ شے ءَ چے تو شر ترئے تو قدرت ءِ سوگات ئیے
کس ءَ وتا کمتر مکن اللہ چہ درستاں مستر انت
گوٛات ءَ دمانے داشت کنت نودانی گپ بے با وریں
آقدرتانی تاج دار، آ رحم دل ءُ زورا وریں
حون ءَ مہ جوشین گم مہ کن اللہ چہ درستاں مستریں
یاتانی دیم ءِ رتکگیں، برپاں کجانگو آپ کن ئے
پہ منزلانی بُرگ ءَ دنزاں گدانی ساپ کن ئے
کُرتگ گم ءِ چادر کپن اللہ چہ درستان مستریں
معراج مرچی زندگی سرگپتگ باریں پہ کجاُ؟
معراج شپانی ماہیکان گپتگ گشے دنز ءُ مُجا
سبزیت مہرانی چمن اللہ چہ درستاں مستر انت
(حب۲۰۰۹)