ارساں دیدگ ءِ ریچے دلاں بہار کن ئے
حرابیں موسم ءِ واستہ تو شریں کار کن ئے
تو پروشے دلبریں چوڑیگاں گوانگ فرماے
شہیدیں آشک ءَ ماں قبری ءَ توار کن ئے
چِدِاں چے لڑئے روئے،یک نشانی یے ایر کن
تو، یات کائے دل ءَ سک بے کرار کن ئے
من گشتہ وابانی آ دوچگراں پرندوشی
منی دوست سور ءِ سیریگا کدیں تیار کن ئے
اے ماہ ءُ کلکش ءِ زیبائی اتکگاں پہ تو
اشاں چے باریں کئے ءَ زورئے دزگہار کن ئے
اے ہیل روت، بلئے عادت چم پچیں شہر ءِ
تو کوریں میتگ ءَ آدینک ءِ مژُداوار کن ئے
زمین ءِ کپتگیں بیراں دل ءَ را انگاراِت
پہ ہلک ءِ بندیاں! قمبر وتا سّگار کن ئے
تئی حیال ءَ دگہ زانت کار نگوٛاہیت اَدا
تو دوستاں یکے کنے، دژمناں ہزار کن ئے
بہ شنگیں مہپراں ءُ بتاں بکش شہر ءِ
ماہکانی ءَ چونی ءَ شپ تہار کن ئے
آ کہریں مرگ ءَ را یک رندے آہگی انت ادا ءَ
زندگیناں چیا مردگاں شمار کن ئے
تو معراج کدّہ کیفانی براہ ءُ جلوہ ئے
توپاد کائے روئے مولماں ملار کن ئے
(جنوری2013کیچ)