بیا پچ بگر موجیں دل ءَ بکشاتگیں زہیر ءَ وتی

بیا پچ بگر موجیں دل ءَ بکشاتگیں زہیر ءَ وتی

پہ من نپر کن دیم بدئے توجیگی ءِ ہیر ءَ وتی

ہند ءَ وتی سرستگاں زمزیل ءُ کیزاں بستگاں

آجو بکن چہ دژمناں عہدانی دزگیر ءَ وتی

چے زیارتانی اے کمال مئے ستک پہ رب الزلجلال

تو اوں توارے پَربکن بے تالہیں پیر ءَ وتی

عہد ءِ نقیبو زرتگوں زیارتاں چانوگ گپتگوں

بالاچے آں الم گراں آ دودا ءِ بیر ءَ وتی

مئے واہگ ءِ امبار ءَ دوست مرواردءِ بکچہ پچ اَنت

چہ من رزا انت نوں ترا زور تو دل ءِ سیر ءَ وتی

منی ترانگ ءُگنجیں زہیر نیل انت اُمل ءَ وپسگ ءَ

کشیت مئے عکس ءَ سیل کنت چہ سرجاہ ءِ چیرءَ وتی

من پہ ترا فرہاد باں بچکند ءُ بیا شرین ءِ رنگ

کشّاں من سِنگ ءِ سینگ ءَ زگریں گم ءِ شیر ءَ وتی

راستی ءِ شاہیم جہل کت درٛوگ ءَ محبت کل کت

ایمان گبّرے کت بہا آ میتگ ءِ میر ءَ وتی

اِدا شل سریں کنٹگ تج انت ادا سنگ ءِ سیاہ ڈنیں ڈل انت

بیا شیشگ ءِ ہلک ءَ امل بنداں اے بادگیر ءَ وتی

معراجؔ نزاناں پرچیا ہلک ءِ جنئکاں یل کتگ

مرچی ابیتک ءُ ایوک انت آ کاپر ءِ چیرا وتی

(1995بگ،کیچ)