نزاناں ! دل کئی گپاں بزِیریں
توامیں شہر چہ ما دیم گیریں
ہما اِنت موسم ءَ گوں زہر ءُ کہراں
ہما اِنت تئی گماں گوں بہر ءُ بہراں
ہما اِنت سند وسیل اِنت سانگ ءُ سیریں
توامیں شہر چہ ما دیم گیریں
من فرہاداں وتی قول ءُ زبان ءَ
من بُراں لک ءِ کوہ ءَ بے انان ءَ
نزانت ترا بلکے رد دنت شیریں
توامیں شہر چہ ما دیم گیریں
چُلک انت مولُمانی شیر ءِ کلی
بہارگائیں دل ءِ نیمغ نہ ہلی
بُز ءُ کاناں ما یکجاہ نہ زیریں
توامیں شہر چہ ما دیم گیریں
زمین ءِ منزل انت یا رُنگ راہ ے
بنی آدم چی یے اللہ بلاہ ے
درٛوگ بندانی ما گپاں نہ زیریں
توامیں شہر چہ دیم گیریں
وفا ءِ شیشگے ءَ پرشت کن تو
زہیراں دیم پہ دیم ءَ کُشت کن تو
نگاہاں نیزہیں آ کارچ ایریں
توامیں شہر چہ ما دیم گیریں
شہر ءِ زیبائیں دنزاں ہواراں
ہمک دیم ءَ بچار کست ءِ گباراں
آ معراج جند ءِ ہلک ءَ سک دیریں
توامیں شہر چہ ما دیم گیریں
(اگست2012)