بیا کہ اِنسرتگیں ارواح ءِ طلب آس مہ بیت

بیا کہ اِنسرتگیں ارواح ءِ طلب آس مہ بیت

بیا کہ ملگوراں سباہانی شپے پُل گوٛپیت

بیا کہ مارشت زَدیں دل مئے ندارگ لوٹیت

بیا کہ گیابان ءِ دُرئیں مُرگاں سُبارگ لوٹیت

بیا کہ بیوانکی ءِ پیشگاہ ءَ سُریں سازے بدئے

بیا کہ شپ درٛنگیں چراگ بینگیں آوازے بدئے

بیا کہ استال شپ ءِ دُراہی ءِ پیغام ءَ زَر اَنت

بیا کہ ہر گژنگ ءِ لوگانی دُناں گوٛات بَر اَنت

بیا کہ دل پُرشتگیں کونجانی سفر دیم ءَ اِنت

بیا کہ اوفار دل ءِ شیشگانی نیم ءَ انت

بیا کہ دروازگاں بازار ءِ چِتگ دنز ءُ گُبار

بیا کہ ہر گریتگیں دیدوکاں گیابان ءِ خمار

بیا کہ استین شَلیت مُرتگیں کاہانی سر ءَ

بیا کہ شنگ اَنت کپوت پُلّ متاہانی سر ءَ

بیا کہ سیاہ مار ءِ گُش اَنت مَرگ جلیں تَریاکے

بیا کہ ہر موسم ءِ لُنٹانی متاہ مُزواکے

بیا کہ ہر نیم ءَ حیالانی بُجیت سنج ظہیر ؔ !

بیا کہ لوٹیت سباہانی بدن مِسک ءُ ابیر