ہر زُلپ ءِ نمیرانیں طلب زعفران بہ بات

ہر زُلپ ءِ نمیرانیں طلب زعفران بہ بات

قولیگ ہر متاہ ءِ سر ءَ زندمان بہ بات

رنگانی گُبار درٛنزیں شپ ءِ چمّ روک بنت

سُہبانی ہر گلاس ءِ تہا شہد مان بہ بات

سینگارگانی نوبتے زیمر شلان کنت

عہد ءِ انارکاں دلبریں رنگے رچان بہ بات

تُنّیگیں موسمانی تہا رنگ مٹ بنت

دریا پہ حاجتے ءِ پدا سر گِران بہ بات

ہر منزل ءَ چراگے ءِ آواز سمبہیت

دنیا کہ تہاری ءِ غماں انسران بہ بات

کُوکُو رچ اَنت گوش ءَ گیابان ءِ اَلّم ءَ

ہر درٛچک کپوتانی اگاں پاسبان بہ بات

ذاکرؔ اے جیڑگانی تہا آس درکپیت

ہر دل کہ وتی اوست ءِ پدا بُن گران بہ بات