من حیال ءِ بُستریں کوہ ءِ سرا اوشات
وہدے دیدگان ءَ شانک دات
دُور گنداں
نوک بانوریں جنکے
نشتگ میر ءِ بادگیر ءِ ساہگ ءَ
گوں وتی شارءَ ءُ شِنگیں مہپراں
چو منارا گوٛانک جنت اِینگو بیا
نَے منی پادانی پادینکاں بچار
نَے منی گوں مہلباں اے شُشتگیں بِیکّاں بچار
نَے منی دستانی دستونکاں بگند
نَے منی اَرس مینتگیں دوچانی آستونکاں بگند
نَے منی اے گرٛیتگیں چماں گوںروک روک ءَ بچار
نَے منا دست ءَ سرا ایرموش
منا نیکہ تسلّاہے بہ دئے
دُور بِگند
دُور بچار
بس منی موجیں دل ءِ
موجریں
درد ءَ
بہ مار