جنگانی جلکشان زیبا انت گلزار بلوچستان منی
آدینک زِھانی کیدءَ انت گلزار بلوچستان منی
نازبوھیں شپاں شورہ شنز انت تیر انت گوں نگاھاں بچکند انت
ساچان پِدائی شنزا، انت ءَ گلزار بلوچستان منی
تراکانی کُماریں بچکندے اے جنگ چراگی پرزندے
زُلپانی سِکالک ءَ بلگ ءَ انت گلزار بلوچستان منی
ھونانی بھاریں تُمکار انت آشوب چکاریں بازار انت
شندانی شبنداں ملما انت گلزار بلوچستان منی
کرپاس ءَ نبشتہ آس بہ کنت دیدار ترا الماس بہ کنت
باروت زمین ءِ سرجاہ انت گلزار بلوچستان منی
مُرگانی مُھبت دزگیراں نی بنگ بہ چارین انجیراں
رنگانی ندارگ تاس ءَ انت گلزار بلوچستان منی
تو دوچ بہ کن ھون ءِ بوھاں ریچاں کناں من نازبوھاں
آ کبرءُ گِسک شوھاز ءَ انت گلزار بلوچستان منی
مُرگاپیں ندارگ زندان انت آواز زمین پربندان انت
مُرگانی بشانگ تیر ماہ انت گلزار بلوچستان منی
نی گاریں کپوتاں شوھازیت آ ماما کدیرانی گازی
نوکاپیں کپودر جنگ ءَ انت گلزار بلوچستان منی
ھوناچ نواب راجی جُنزے اے آب ءُ ھوا مُھرگ شنزے
نی جنگ ءُ مھبت ھمراہ آں گلزار بلوچستان منی