رھنیں مندریک سیمرگاں آزرات کتگ
تئی زیبائی مرگاں ونتگ یات کتگ
مھرنگانی پادءِ ھاکاں بوسہ د ئے
مھر گلاباں وش اتکی درھبات کتگ
ماہ ءِ سپرءَ گوات ءِ جمازاں گوشتگ
ما ھم آس ءِ کسمانکے بندات کتگ
یک دیدارے ارواہ ءَ گوں پیوست انت
یک آوازے ما داں امرءَ یات کتگ
چولاں روپ گوں چولاں گورشان ءَ ایریچ
زر ھامین انت تبگوات ءَ تبگوات کتگ
تئی مھرانی سان ءَ ارواہ سر سبز انت
مبدہ پان ءَ ساہ کندن ھیرات کتگ
گورستان ءَ آزمانی پازل روک انت
کبرستان ءِ دیوالاں پریات کتگ
ما چہ دوریں درملک ءَ واتر اتکیں
مے بازارءَ آب ءُ ھوار ھیرات کتگ
مردم جند ءِ جِنّ ءِ کلات ءَ در بیتکیں
مردم جند ءِ آیاتاں آیات کتگ
نیست کبس نی زندان ءَ سانکل مان نیست
مرگءِ سلیمان من ھم نواب آزات کتگ