کدی کائے منی کُلّ ءَ حیال ءِ دلبریں بانور
دل ءِ آزمان ءَ مانشانتگ زہیرانی تئی تامور
کدی بیتیں کہ وَیرانیں منی دلبند ءِ میدان ءَ
بہ شنگیت سُہرچکیں تئی شار، بہ شنگنت ڈَکّمیں ملگور
بیا تو ساعتے پہ من بہ شانک اِستالیں دیدوکاں
کہ بلکیں درٛاہ بنت زند ءِ منی اَندوہ ءُ درد ءُ دور
من وہدیکہ وتی کیچ ءِ چنال ءَ لُڈّگ ءَ گنداں
منا تو یات کائے بے کساس ءَ دلبریں بمبور
منی کہ پتّر ءَ پُرس ءِ پہ شنگنت تئی اِے لاسیں اَرس
من زاناں ماہکاں بیتیں پہ من لُنج ءُ تہاریں گور
سَتر چاکر بہ بندنتیں گوں مُہریں تَیل ءُ زمزیلاں
مُراد ءِ منزل ءَ سر بیت مُرید ءِ واہگانی بور
منا ممتاز وتی اَرواہ ءُ اَبدالیں سر ءِ سوگند
ترا کہ پہ بدی چاراں منی دیدگ بہ باتاں کور