ارس ءِ شیپّارک ءَ نہ سگّاں دیدگ
درد ءِ چابُک انچوزوراک اِنت
کَست ءِ اِزرانک ءِ بیمّ ہونین اِنت
موتک ءِ بانور اوں جنوزامیں
ماہ ءِ ہیناریں رژن لاچاراں
شپ وتی لُنجی ءَ اُپّا ریت
آزمان ءِ نسیب دنزین اِنت
دوزہ ءَ جنت شگان آس ءِ گَم
روچ ویرانی ءَ وتی ماریت
کیلّگاں تبدے ءِ وپادْروہیت
دْرچکاں ویرانی ءِ گناہ سوچیت
گژنگی گْوات ءِ باتن ءَ جیڑیت
چو پکیر ءِ گِلّہ ءَ تژن ءَ
آپ ءِ اُپّارگانی تُنّ درئیت
موسم ءِ دست ءُ پاد سکّ لرزَنت
گْوانزگے کئیت چہ گشئے گَیب ءَ
مہربانیں گوں ماتے ءَ دُرجیں
گلزمین ءَ چو تپلے ءِ پیما
دنت تَسّلاپہ سَوت سہڑینیت
بال کنت گوں زمین ءَ ارش ءَ رَوت