دْرچک ءِ بیرانی ءَ جیڑگاں

دْرچک ءِ بیرانی ءَ جیڑگاں جیڑئتہ

جنگل ءَ گَم کتہ ساہگاں جیڑئتہ

گْوات واب اِنت چیا موسم ءِ دیدگاں

پہ ہمے ہاترا زندگاں جیڑئتہ

مسلءِ کوہ ءَ نہ بیت پرچابستار مئے

رہسرءِ کپتگیں مہرگاں جیڑئتہ

پہ کدیمءَ کجام آس پزّور بیت

انگریں نوبت ءِ کینگاں جیڑئتہ

ماہِکان گوں ترا آزمان گِلّہیں

تو تہاریءِ گوں سرمگاں جیڑئتہ

تلک چیریں مدام کیلّگ ءِ باتنءَ

مُرگ ناسرپداں، ما اگاں جیڑئتہ

سکّیانی دل ءَ تْرمپے آسودَگی

بار گْرانیں منی کوپگاں جیڑئتہ

بار گپتہ گشئے ننگ ءِ نودیں نسیب

گْورم ہشکاوَگاں چّمگاں جیڑئتہ

تو کہ بچکند ئتہ ارس آجز نہ بنت

جوریں ورنائی ءِ بینگاں جیڑئتہ

لاگریں چو منی تُنّ ءَ دریا شکسؔت

سوزمان گژنگیں توشگاں جیڑئتہ