ملگزاریں زند اوستانی کسانیں رہسرے
دل کہ سبزیت چو بہار ءَ آس گوٛاریت جمبرے
گلزمین ءِ سینَگ ءَ چہ شِیر درکَیت یکبرے
بینگیں سسا بہ ساچیت جُہد کاریں رہبرے
آس سرٛپتگ بے زُبانیں دلوتانی کہچرے
کَے شُدیگیں اُشتراں پہ کاریت گزّ ءُ گِیشترے
منزل ءِ راہ ءَ نشان دنت راہ شناسیں پَد گِرے
منزل ءِ نزّیک ءَ شِنگیت درٛاہیانی زیمرے
واہگ ءِ آپ ءَ بہ دُزیت سرگنوکیں بزگرے
تیوگیں راہ ءِ مسافر تُن ءَ بند انت چادرے
رپتگیں دوستانی دور ءَ یات گیجیت شاعرے
نگرہیں باندات ءِ اوست ءَ پَہر بندیت ذاکرؔے