پہ زند ءَ ئے گریوان بیں
پہ مرگ ءَ ئے کندان بیں
بدوا اگاں بیران بہ بنت
من تو گل ءُ شادان بیں
وسّاچیں سیاداں چوں کنیں
بیا سیادیاں سندان بیں
زہریں کشارانی براں
بیا اِت دِلاں شودان بیں
گوں دژمناں دوستی چیا!
بیاں دوستیاں سندان بیں
کوریں دلاں رُژناکنیں
سیاہیں دلاں پروشان بیں
زوراک ءُ جہلیں مردماں
بیا اِت جِتا بُوّان بیں
مارا طبیبے دراہ نہ کنت
بیا وت وتی درمان بیں
ساہ ئے کنیں شوہاز ما
مات ءِ دل ءِ ارمان بیں