بلوچ بندیگانی نامءَ
من دود ءُ رسمانی
تَیلاں بندیں
بلوچکے آں
منا اے عہدءِ
مسافرانی
سلام گون اَنت
کہ قرن ءُ باریگ
دور ءُ وہد انءَ،
موسمان ءَ
مان ترّینتگ اِش پہ وَزمے
پادشپادی مں رُنگراہاں
رَندگا اَنت کلکشانے
پہ گُلزمین ءَ
اے پور ءُ کلکش
زمین، آزمان
ماہ ءُ اِستال
واب گِندنت ، بنت تکانسر
روچ جیڑیت وتی گوں برٛانزاں
ماہ ءِ اَلوت گوں ماہکان ءَ
تہاریں جمرّ
ترٛمپ ، ترٛمپ ءِ حساب دارنت
سمین گاماں
ایرگیجیت ، لہم لہم ءَ
مں گُلزمین ءَ
لوار ءُ تبدانی دست لرزنت
پہ آس ءِ روک ءَ
بَلئے
سلام ءَ علیک کئے کنت
پہ عہد ءِ عمر ءَ
اے وہدی بیگاہ ءَ کیَ شموشیت
دست بنداں
پہل کن اِتءُ منا بہ بکش اِت
نہ زانتکاریں
بلوچُکے آں
منا اے عہد ءِ مسافرانی
سلام گون اَنت،
راہ چارنت
سمین ، کلکش
زمین ، آزمان
ماہ ، اِستال ، ماہکانی
لوار، تبداں یا موسمانی
دِلاں بہ پُرس اِت
چہِ پیم رنجینتگ اِش وتارا
پہ عہد ءِ رَہنانی مانزمان ءَ
منا اوں بازیں ملام گون اَنت
منا اے عہدءِ
مسافرانی
سلام گون اَنت
دود ءُ رسمانی
تیلاں بندیں
بلوچُکے آں
ملام گون اَنت
منا اے عہدءِ
مسافرانی
سلام گون اَنت