او منی بیل ءُ مُکیمی ہمبلاں
چہ شما
کئے اِنت منی بار ءَ دل ئیگءَ کنت
تلام ءُ سربہ کنت
اَدّیرہے
چہ منا تاہیرءُ تاگت ہم اَزیت
زندگی ءِ شیرکنی
اَرواہ ءِ رُوحءَ
در لَگُشت
دیدگ ءِ کانیگ
ہشک اَنت
ءُ دل ءِ بندانی چَمّگ
تُنّگ اَنت
روچ منی چمّاں نہ بکشیت
روشنی
شپ منی بے وابی ءَ
وابے نہ دنت
گوں منی سارتیں سمین ءَ
دزگہار اِنت
دوزہے
بیاندارہ کن
زِر ءِ گوٛات
آپ ءُ آس ءِ ہور ءُ توریں دوستیءَ
کوئٹہ ءِ قہریں زمستان
گیجگا اِنت مَچّ رنگ ءِ ترٛانگ ءَ
او منی بیل ءُ مُکیمی سنگتاں
سک گُروناک اِنت مروچاں ملکموت
نشتگ ءُ کنتیں ندارہ ءَ منی
ساہ کندن ءِ
او منی بیل ءُ مُکیمی ہمبلاں
چہ شما
نیست کسّے کہ منی
اَرواہ ءِ چیہال ءَ بہ اِشکنت
گوں دل ءَ
در نئیت یکے
دپ ءِ پُرّ ءَ
دل ءِ توکا
تلاوت کت بہ کنت
یاسین ءُ دُرودی آیتے
ساہ پہ اَرزانی درئیت