چّم ءِ کپوتءَ ارس ءِ بانزل ٹٹاتگاں
بے مردگ ءَ اے کبر کئے ءَ بار داتگاں
اے زندگیءَ گژن وتی دْرتکہ باتنءَ
کُلّیں زمانگ ءِ گشئے ماڑی کرُتکگاں
ڈکّال ءَ واہِتہ پدا مہرانی کیلّگ ءَ
بیران بوتہ جنگل دْرچکانی جیڑگاں
ما ششتگاں تہاری ءِ گْورم ءَ دُْرہیں چراگ
استال ماہِکان ءَ چو تیزی کماتگاں
کست ءِ ترونیں روچ ءِ سرا مہر بوگَلاں
ارواہ ءِ ساہگ ءَ منی سیمُرگ نشتگاں
ہَیراناں چول جُلگہیں دریا ءِ کوپگ ءَ
آس ءِ تہا من دَور کتہ بْرانز گْوپتگاں
کوہ ءِ شگاناں موسم ءِ تاہیر تلوسینت
گْوات ءِ کرامت ءَ چوگشئے سنگ سُپتگاں
بچکندئتہ تو وہدے منا شہد بکشئتہ
گْریتگ زمانگءَ وتی دیدگ شمشتگاں
تُنّءِ نسیب ءِ ساہگءَ دوزہ اوں گژنگ ات
تُنّیگ اتاں نہ رَستاں کدی آپ ءِ روتگاں
مرچاں وپاءِ مُزّ ہمے دْروشمُا رسیت
پاہو بہ گندئے داتہ بلّک نماسگاں
مہمیز داتہ استیءَ نیستی پہ پہر ءُ شان
اے گلزمین ءِ کانچ ءِ وڑا اوست پْرشتگاں
مات ءُ پتانی مہراوں نسیب ءَ نہ بوتگ ئےِ
چورہ اے اہد ءِ زالماں یکّ یکّ ءَ کُشتگاں
ارسانی اپس چولے ءِ اِشکیل ءَ مان اڑئت
گلمیہہ ءَ دیدگانی دریا شَبستگاں
اوپار کشّئتہ منی بے چارگیں دلءَ
دردانی ترس ءُ بیّما چہ باتن کرُتکگاں
مہمیز کہ بہ دنت اشاں تُرسیت ہرکَس ءَ
زوراوراں مئے ڈیہہءَ وتی بار بوتکگاں
تُمکاریں جٗون ءُ ہون ءِ منی زند ءِ کیلّگ ءَ
گٗولا ءُ تیرءُ بمباں دُْرہیں لوگ سوتکگاں
ما مہر ءِ ساہگانی سرا نود شنزئتہ
رنج ءُ گَمانی دوزہ تئی آس مُرتگاں
بے ہال کرتہ آپ ءَ وتی تُنّ نمبگ ءَ
اے اہد ءِ کانیگ ءَ وتی چمّگ شمشتگاں
دانکہ تئی دیدگانی رژنائی آجزیں
دست ءِ تئی شپ تہاری ءَ مژدہ اوں برتگاں
اے اہد ءِ دزنہ اوشتیں گنہگاراں کہ بہ زانت
باریں کجام آپءَ وتی چّم ششتگاں
اے زندگی شکسؔت چو ہوشامے مُجّتی
دریاے آپ وارتہ بلئے، انگہ تُنّگاں