ودارءِ روچ دنزیں چمّےءَ اِیر برت
دو ہپتگ بیت،
مُجے ءَ مانشانتگ،
گرم جولان اِنت
بگندئے تئی رؤگ اے موسم ءِ
ارواہ ءَ اِیر کپتگ
کہ مردم آپ بُوہان اِنت
تو سکّ ءَ گیر پیداک ئے
نگاہے چست نہ بیت کہ آزمان ءِ،
دیم پولنگ اِنت
جبین ءَ ہُپ نہ کنت گواتے
نپس کَشّاں تئی بالاد ءِ ملاریں
کئیپ سرشاننت
اَجب چاڑے چکاریں ریکباراں ،
آس مالان اِنت
تئی ترانگ بہشتی لزتے پروشیت
جتگ اوستانی گندار ءَ
نہ گورتگ جمبراں بشامی ہوشامیں
مُجے ،دنزے، بلاہ ءُ بِتّرے چی ے
سچان اِنت سہب ءِ دل بیگہ ءِ اِیرگوات ءَ
وتی مہر ءِ زری کوشاں گدارے پمّن
راہی کن !
تو سکّ ءَ گیر پیداک ئے
نپس کَشاں تئی بالاد ءِ
ملاریں کئیپ سر شاننت
اَجب چاڑے چکاریں ریکباراں،
آس مالان اِنت