ترا کہ وہدے پہ داب گِنداں
من آگہی ءَ اوں واب گنداں
چوں گیش بنتیں تئی شیرکنیں غم
من ہردے اَجگیں گُلاب گِنداں
اے عشق ءِ راہ ءِ درٛہیں مُسافر
گُناہ گِندنت ثواب گِنداں
من مرچی درد ءِ زِر ءِ مَیاراں
بگندئے باندا تیاب گِنداں
ہمیش گنجے پہ زندمان ءَ
تئی شُہاز ءَ عذاب گِنداں
تئی اَنارکاں چہ رولہ ءِ رَنگ
تئی دِیدگاں چہ شراب گِنداں
کدی ترا من چو تاک تاک ءَ
او آزمانی کتاب گِنداں
گُل ءِ شُہاز ءِ من راہ ءَ ممتاز
وتارا چوں بے ثواب گِنداں