رولہ ءَ رپت اَنت زہیرانی کتار
شگرب ءَ داں مگرب ءَ تہنائی اِنت
گوات ویران اِنت نزانت کوکو بہ کنت
نہ و تارا بالو یے کریاب کنت
مار ءُ مُہرگ گوں انارکاں شم بہ بنت
جم بہ بنت استارریکی پلّواں
ما کجام ہارانی ہیروپاں شتیں
جلوہاں دْرنگ ءَ نہ بست اَنت ماہکان
نہ کہ زپتیں اینزکاں شیر منتگ اَنت
روچ روز رد ءَ مدام بیچاڑ بیت
درین جنکی کٛرام کنت
کوش ایسکاراں رجینیت گوں دُناں
کوٛنج سوری سمبہنت
دیم کُراسان ءَ رَؤنت کبگی کتار
رِپک ءُ رائیشپاں نہ کپتگ زندگی
دل پہ ملگوریں مراداں تلوسیت
کس مئے اُپّاراں دپی جستے نہ کنت
دل عجب دلمانگ اِنت
دیگر ءَ کہ مُرگ شینکاں شم کننت
گیرکائے تو منا چمّانی نور
تو منی بحت ءَ چوکوہ ءَ کپتگ ئے
من نزاناں تو کجا سرگپتگ ئے
شیشگاں دْروہنت دلانی آپ ءُ آس ءَ
تئی منارایات کائینت بے کساس ءَ