ہما کہ مہر ءِ شراباں چہ دیدگاں نوش اَنت
آپ سمّاک ءَ جتگ، انسٹیٹیوٹ آف بلوچیا، 2019
شِنگ کن:
ہما کہ مہر ءِ شراباں چہ دیدگاں نوش اَنت
داں زندگ اَنت پہ تئی دیدارے ءَ ہلا ہوش اَنت
ہما کہ آہاں وفاداری ءِ زبان کتگ
مروچی جند ءِ وتی گشتناں فراموش اَنت
شپانک میتگ ءِ ہر چون زانتکار بہ بنت
زانتکاری ءِ سنٹیں بُز ءَ کجا دوش اَنت
ادا کہ دْروگ چو کائیگر ءَ گروناک اِنت
من راستیں گپے دپ ءَ درکناں سر ءَ پروش اَنت
اے شعر ڈیہہ ءِ شہیدانی ہاترا نٛدر اَنت
اے لبز مہلبیں قربانی مسکیں سرپوش اَنت
وتا اے قاضیؔ ءُ ملّا بزر جمہیر گشنت
ترا کہ پجہ نیار اَنت کجا سر ءَ ہوش اَنت