وتارا جند ءِ تہا در پہ در کنگ لوٹاں
آپ سمّاک ءَ جتگ، انسٹیٹیوٹ آف بلوچیا، 2019
شِنگ کن:
وتارا جند ءِ تہا در پہ در کنگ لوٹاں
مسافرے آں، داں استاں سفر کنگ لوٹاں
بدل بوّان اِنت زمانگ چو موسم ءِ پیم ءَ
من دژمن ءَ وتی دوست ءِ نپر کنگ لوٹاں
گَرز نہ داراں گوں امروز ءِ عیش ءُ نوشاں من
دپارے سٛرتگیں نان ءَ گُزر کنگ لوٹاں
اے ارس تپتگیں سر زاہر ءَ نہ بنت زاہر
من اندر ءَ چکنیں جیگ تر کنگ لوٹاں
کسے بدنت زِری نوداں منی اے پیغام ءَ
من انچیں دْرچکے آں بے آپ ءَ بر کنگ لوٹاں
تو بِلّے شاعرے ئے قاضیؔ ہشک ءُ حیرانے
من بِلّے گنگے آں گوں تو حبر کنگ لوٹاں