دیما منی دمبرتگیں ارواہ ءِ ژندیں ساہگ اِنت
پشت ءَ منی ٹپ وارتگیں بالاد ءُ شیدائیں دل اِنت
راہ ءَ ہزاراں دْرچک ءُ دارایْوک چو کیّا ءِ کہیر
چندے زہیر نالیں کپوت گْریونت چو کریابیں صدو
سیاہ تاک اَنت مرچاں ارزنیں گّرانی ءِ سبزیں کہیر
سہتے نْدارگ مٹ بیت
بُرّے فقیر اَنت کابلی چو رستراں مان رتکگ اَنت
دور چہ گدانے حانی ءِ پاد بْرمش کئیت
دل چو مریدءَ زنزریت
دِیریں حیالے ءَ کپیت
من پشت ءُ دیما چَک جناں
یکیں نْدارگ رؤت ءُ کئیت
دیما منی دمبرتگیں ارواہ ءِ ژندیں ساہگ اِنت
پشت ءَ منی ٹپ وارتگیں بالاد ءُ شیدائیں دل اِنت
ہچی دگے گندگ نہ بیت
چندے ابْیتکیں بانڈم اَنت
ارواہ ءِ کچکول ءَ ودارے ہم نہ منت
یک راہچارے ہم نہ بیت