جیڑاں من دل ءَ

من وتی گْوست ءِ ملاراں گْوستگاں

کترھے رِتکگ چہ چمّ ءِ کدہ ءَ

دْمک ءُ در حیرانی ءَ چار اَنت منا

من پریشاناں چو گاریں مردم ءَ

یک نگاھے چاراں بالاد ءَ وتی

ءُ پدا نا آشنائیں بانڈماں

سہتے ساساراں دل ءَ تاگت کناں

مانروپنت چپ ءُ چاگرد ءَ حیال

زندگی چی ئے، من چیا اتکگاں

انگہ من اے جیڑہ ءَ سرپد نیاں

سد رگ ءَ یکے نہ جنت باور کن اِت

پیشی آں گُشتگ، من ام انچو گُشاں

چار روچ ءِ زند ہر رنگ ءَ گْوزیت

گوں پُرانیگے گوں پمیازی بُن یے

بَٹ ءُ ماشے بیت کہ گوشت ءُ گلّہ یے

کڈکے بیت، کاپرے بیت، شپ گْوزیت

من بلے شاہ ءِ سر اِنت سرپد نیاں

زندگی چی ئے، من چیا اتکگاں

من وتی گْوست ءِ ملاراں گْوستگاں

کترھے رِتکگ چہ چمّ ءِ کدہ ءَ

چو درآمد من کنارے نشتگاں

دل منا جیڑیت ءُ جیڑاں من دل ءَ