کیف ءُچاڑیں سازءُزیمل کوہ سرئے ءَ پیش کت
دل وتی من پُل ءِ ڈول ءَ دلبرئے ءَ پیش کت
یک شپی نودیے بہ شنزیت میتگ ئے سر سبز بکنت
واہ ءُفریات ئے ما زرت ءُجمبرئے ءَ پیش کت
حانی یے انچش زِتگ ہلک ءِ اے کوہیں حاکم ءَ
لہڑیں پاہار شے مرید ءَ چاکرئے ءَ پیش کت
ہنچو تنیگ ات کہ نیم راہ ءِ منی ہمراہ نہ بیت
من دل ءِ مہریگ ءِ تن پہ آپسرئے ءَ پیش کت
اے فرشتہ انت دل اِش حرچی بلوٹیت کت کناں
جنتّی دروازگے پہ کافرئے ءَ پیش کت
آوکیں چند مردمانی پاد ءِ پد بیگوٛاہ بنت
من ودار ءِ چنککے ارس راہ سرئے ءَ پیش کت
گلزمین پولنگ شودانت کہر ءُ کہریں آچش ءِ
کہ نشان آجوئیں زند ءِ یک سرئے ءَ پیش کت
نلیں دریا ءَ سرئیگ ءَ دل سرئینتگ وسرا
یک دمانے دل وتی ما گوادرئے ءَ پیش کت
قدرتاں اللہ ءِ ہنچیں زانگ ءِ پہم ءَ در اِنت
یک درئے ءَ بند کت ءُیک درئے ءَ پیش کت
جی ببات آ ریدگیں پیشانی سارتیں ساہگ ءَ
شیرکنی یے کوہ بن ءِ یک کونرئے ءَ پیش کت
درد ءُ اندوہاں جہان ءِ کسہاں کوتاہ بکنت
زندگی ءِ دردوں معراج شاعرئے ءَ پیش کت
(2014راسلخیمہ،امارات)