من تئی وشبوہاں

من تئی وشبوہاں تو منی پُل

من تئی کہیراں تو منی شانتُل

من تئی درٛچکاں تو منی بلبل

جان جان مہر جان، من تئی شے آں تو منی حانلؔ

وتی جامگ ءَ سیل کن بچار نکش ءُ نگاریں

روچ اتکگاں، نزیک تئی سور تیاریں

تو جیگی ءِ بندیکاں مکن چوشُل

من تئی شےآں تو منی حانلؔ

عہدانی کماشاں ترا دستاں بہا زرت

کیچ ءَ یلا دات سور آپ ءَ ترا بُرت

سرجت تئی بحت ءَ نون کجا فاطل

من تئی شےآں تو منی حانلؔ

تیریے بے انان ءَ دلبند ءَ جت ئے تو

پہ سیل ءُ ندارگ ایران ءَ شت ئے تو

واتر بئے کائے چہ کدی زابُل

من تئی شےآں تو منی حانلؔ

آستنکانی مہرگ دوچاناں تلاہ بند

دل ءِ واہگ ءِ گرٛنچ ءَ جوانیں جائے ءَ مُہربند

بلکیں بہ بنت سرجم دل ءِ تئی ہل

من تئی شےآں تو منی حانلؔ

نام ءِ سرا جنگ انت اِدا تیر ءُتپنگ اِنت

رنگ ءُرنگیں بلوراں ارسانی چے رنگ اِنت

مروارداں چمانی مکن گُلگل

من تئی شےآں تو منی حانلؔ

وش انت تئی آواز تو چیزیئے ہنچیں

حیران کنے باز تو چیزئیے ہنچیں

شرنگ ءُ حسین ئے تو منی زیبل

من تئی شےآں تو منی حانلؔ

ارسانی درٛد ءَ انت دل جنگل ءَ شات انت

امبروز ءِ آ بچکند نوں سہن ءُ برات انت

چہ انگراں درکپتگ گم ءِ سامل

من تئی شےآں تو منی حانلؔ

امیت نہ بوتگ دل ءَ اوست نہ بوتگ

بیدئے ترا معراج کس ئے دوست نبوتگ

بیا بیا بے چراغ انت اے زہیر ءِ کل

من تئی شےآں تو منی حانلؔ

(جنوری2012کوئٹہ)