امبروز ءِ رنگاں شر تریں پیروزہ ءِ دانگ منی
پُلّ ءَ گشے نازرک تریں پیروزہ ءِ دانگ منی
منی پسنی ءِ تیاب لمب منی کیچ ءِ پلکیں مچکدگ
چمانی دیما گوادریں پیروزہ ءِ دانگ منی
ایمن مبوکہ ما پرٛشیں عہد ءِ ما بدواہاں کشیں
گرکی ءِ وڑا کوہ یے گریں پیروزہ ءِ دانگ منی
ہلکءَ ہلوہالو بیت حانی ءَ بارت انت شے مرید
جنگ ءَ تیار میر چاکریں پیروزہ ءِ دانگ منی
منی گلزمین ءِ رنگ ءُ بو، کوہانی شہجوئی کلوہ
زیدانی گوٛات ئے ہمسریں پیروزہ ءِ دانگ منی
نیمونے نوکیں پیش کنت درٛوگاں زمانگ گیش کنت
راستی چہ درستاں شر تریں پیروزہ ءِ دانگ منی
وہد ءُ زمانگ چُٹّ اِتگ دوستی ءُ سیادی کُٹّ اِتگ
گوشت ناخن ءِ شر ظاہریں پیروزہ ءِ دانگ منی
پیروزہ انت سہب ءِ سمین، پیروزہ انت مہر ءِ زمین
ہرچ قدرت ءَ دیما تریں پیروزہ ءِ دانگ منی
پیروزہ ٹہل ءُ داب کنت، پیروزہ واباں کنت
دنیا شُتگ ماہ ءَ سریں پیروزہ ءِ دانگ منی
توپکے زوریت درکپیت ہلک ءِ دل ءَ آزات کنت
تیرانی گرٛنچ ءُ چادریں پیروزہ ءِ دانگ منی
یاتانی برپ ءِ موسم ءَ کپتاں من تبدانی گم ءَ
کلمانٹی ءِ نام ئے پِریں پیروزہ ءِ دانگ منی
ارسانی ہور ءَ ایردئیے درداں کُشے ءُچیر دئیے
دستاں تئی کارچ ءُ خنجریں پیروزہ ءِ دانگ منی
مستانگیں پروانگیں دل پہ وطن دیوانگیں
معراج ءِ رنگ ءَ شاعریں پیروزہ ءِ دانگ منی
۲۰۰۸مئی،بیگ،کیچ