شریں زبان بلوچی

منی ساہ منی ارواہ، منی جان بلوچی

شرین زبان بلوچی، شاہی زبان بلوچی

راج دپتر ءُ تاریخ ءَ پیداک چہ حلب ءَ

چہ زات ءُ رگ ءُ ریشگاں ہمگرنچ عرب ءَ

پیگمبرانی دور ءَ جنگ گوں یزید ءَ بوت

بغداد ءِ چرا دمکاں باز شام ءِ شہید ءَ بوت

داں قیصر ءُ روم ءَ گر سیستان ءُ آ ایران ءَ

گوں رِند ءُ گوں لاشار ءَ سربوتگے مکران ءَ

سک درٛاج اِنت تئی کسہ ءُ داستان بلوچی

شرین زبان بلوچی، شاہی زبان بلوچی

قندہار ءِ بورینتگ جلال خان ءِ کپند ءَ

تحت دہلی ءِ شنگینتگ میر چاکریں رِند ءَ

میر نُوری نصیر اول ءِ دربار ءِ تہہ ءِ جنگ

جام دُرک ءُ ملا فاضل ءِ شعرانی توئے رنگ

گوں گوڈوی نالان لپاشان بہ بیت سیبی

گوں گوہرءِ ہِرّاناں منی ڈاڈر ءَ چے بی

کس داشت نہ کنت بوارنی دنزان بلوچی

شریں زبان بلوچی، شاہی زبان بلوچی

منی سید ظہور شاہ ئے منی پلیں عطاشات ئے

سالونکیں کریم دشتی منی ساحر ءِ درہ بات ئے

بابائیں جمالدینی ءِ مہرانی تو سوغات ئے

عنقا ءِ تو ارسانی پلکندگیں آیات ئے

گل خان نصیر ءِ تو زندان ءِ حکایت ئے

بیداریں بشیر ئے تو ملک طوقی ءِ اروا ئے

چنت نام دگہ حاک ءَ تئی مان بلوچی

شریں زبان بلوچی، شاہی زبان بلوچی

تو ڈیرہ ءُ پیرکوہ تراتانی سلیمان ئے

بیسمہ ءِ بچکندئے منی سبزگیں خاران ئے

کنڈ کوچہ ءُ سوراب ئے تو کوہلو ءُ بارکھان ئے

تو تمپ ءُ قلات ئے کوہستگیں زامران ئے

ہرچ نیمگ ءَ برز بلند شان بلوچی

شریں زبان بلوچی، شاہی زبان بلوچی

تو جنرل مری شیروف حیربخش ءِ تو ایمان ئے

تو اکبریں بابا ئے تو پہر ءِ بلوچان ئے

غوث بخش آ بزنجو، منی غوثی ءِ فرمان ئے

تو شے رگام ئے یا شے عمر خان ئے

رودینی ءُ بادینی، جمالدینی ءُ موسیانی

تو کلپریں بگٹی ءُ دینارزئی نوتانی

گلدستہ ئے پُلّانی تئی شان بلوچی

شریں زبان بلوچی، شاہی زبان بلوچی

تو زیارت ئے برفان مستونگے ءِ تو، تو دان ئے

لیاری ءِ مزن مریں ملیر ءِ منی شان ئے

تو درٛائیں عربستان تو جلگہیں ایران ئے

ستار ءِ گہیں سازئے تو عارف ءُ نورخان ئے

تو قادک ءُ تو جاڑک ئے ناکو فیضک ءِ الہان ئے

تو نورل ءِ صوتان کنڈی ءِ نزیر جان ئے

گوں سبزل ءِ زہیروکان، الہان بلوچی

شریں زبان بلوچی، شاہی زبان بلوچی

تو مومنی شعران ئے، ملا فاضل ءِ آگال ئے

نعت ءُ ثناہ رب ءِ بگٹی ئیں جوانسال ئے

میر چاکری شیہک ے زیارت ءَ دمال ئے

گہرام دل ءِ بندیں پہرانی مثال ئے

بی برگ ءُ آ گراناز ءِ مہرانی سوال ئے

معراج زبان دوستی ءِ تو نوکتریں گال ئے

معراج ہمے مہر ءِ منی شان بلوچی

شریں زبان بلوچی، شاہی زبان بلوچی