یک برے بِلّ

یک برے بِلّ کہ پدءَ من تئی کُلّ ءَ کایاں

بلکیں تْرسئے نہ شلیناں وتی ھونیں ارساں

نَے کہ گوں تو وتی شُومّیں دِل ءِ زنگاں ریچاں

پہ تئی دوستی ءُ مِھر ءَ من نہ بنداں دستاں

ھاؔنی ءُ ماؔھو ءِ باور بکن سوگند اِنت مناں

یک برے بِلّ کہ پدءَ من تئی کُلّ ءَ کایاں

نہ پہ وش زیملیں گپتار من ریپیناں ترا

نَے کہ من گْوستگیں آ تْرانگاں پِرّیناں ترا

نہ چو نُگبھتیں شپاں سُھبیگ ءَ نندیناں ترا

بَس چہ تو گُڈّسری نْیادانی مُراداں لوٹاں

یک برے بِلّ کہ پدءَ من تئی کُلّ ءَ کایاں

تئی ملگوراں نہ چُکّاں تو اگاں وشّ نہ بَے

نہ تئی آبریشمیں دستاں تو اگاں وش نہ بَے

ماھیں دیم ءَ تئی نہ چاراں تو اگاں وش نہ بَے

بلے یک سھتکے بِلّ شُومّیں دل ءَ سَھڑیناں

یک برے بِلّ کہ پدءَ من تئی کُلّ ءَ کایاں

وھدے اِے بے وسیں اُپّار پہ تو کَیت ءُ رَس اِیت

من نزاناں چتور پمّن تئی دل دٗور نہ بیت

منی نالگ دلاں بے سار چہ بَنداں سِند اِیت

رُکستوں دَے کہ تئی سِنگیں دل ءَ ھم چاراں

یک برے بِلّ کہ پدءَ من تئی کُلّ ءَ کایاں

زاناں زھرئے بلے آھوالاں منی گوش بدار

مِنّت واراں تئی اے گالاں منی گوش بدار

بْرتکگ سجّیگیں دل ءِ ھالاں منی گوش بدار

چِتور دِل دٗور نہ بیت اِنت کہ اِنگت ورنایاں

یک برے بِلّ کہ پدءَ من تئی کُلّ ءَ کایاں

تْرک اِتگ دل منی ھالاں ئِے پہ کے سر بکناں

سوج دَے گوں کے ءَ ھانؔل تئی زنگ ءَ بجناں

اَرس ءُ ھِیکّار مدار اَنت اگاں چے بگْوشاں

دژمناں گوں، من چتور پہ تو ھبر شات کناں

یک برے بِلّ کہ پدءَ من تئی کُلّ ءَ کایاں

زھیراں واد آزگیں ٹپّانی سر ءَ پِرشانتگ

پہ دل ءَ وژدلیں دَورانی گماں ماں شانتگ

چنکے آپ لھڑ جنیں دریا ءَ چہ، من در شانتگ

پِیلّی جوش گپتگیں ھاراں تا کدیں داشت کناں

یک برے بِلّ کہ پدءَ من تئی کُلّ ءَ کایاں

گُڈّسری نْیاد ءَ تئی، شُومّیں دلوں سکّ بند اِنت

اِے مراد ءَ تا نہ گنداں نہ مِراں سوگند اِنت

کہ درآتک ھم نہ کنت ارواہ چہ گماں بے زِند اِنت

اگاں تو مَنّ ئے تئی کُلّ ءِ تہ ءَ ساہ دیاں

یک برے بِلّ کہ پدءَ من تئی کُل ءَ کایاں