کْوهنیں رنگ

دوشی ماں واب ءَ آتکگ اَت ماہ ءِ دروری

آ کھیبانی بانک ءُ لُڈّوکیں پری

تو گْوشئے پچ بوت تا کچھے میری گْوات گری

یا بھشت ءِ رہ بوتگ اَنت دربند ءُ دری

گُلبدن آ گْرانماول ءُ ماھیں گوھری

لال ءُ مروارد دست بند اَنت پہ کستری

پیلہ ءُ مگنائیں سریگ ءُ سر چادری

ڈول ءُ زیبدار اَت آ اَجب بے تلّ ءُ زری

دزگْوھارکّانی مزن راجیں سروری

ھاجت ئِے نیست کہ پِر بکنت سھتاں زرگری

دیدگاں آسکی شانک دنت ماھیں گُلپری

لسّئیں آھوگے در کیت پہ کھچری

شیپگیں پونز ئِے نکشے کاٹار ءُ ھنجری

باج نہ بارت کسّے چائی پہ رنگ ءِ شرتری

نُگرہ ءِ پاکیں چانگ ءُ اِستین کوکری

زید ءُ بالاد ءَ تو گْوشئے سَولے جُوسری

بُو چہ ملگوران زَر اِیت مِسک ءُ اَمبری

ءُ چہ آ گیوار ءِ دُناں سارتیں انتری

لال گوں آبے دوچیں گُداں تائیدے گْوری

کہ دگہ سازے گیش کنت درداں دہ سری

داب کنان اِنت گُل کہ گْوشئے کبگے کوھسری

لُڈّگاں گوں کنت زْیات، منی درداں آسری

پہ دگہ ڈولے ساز اِتگ زوراک ءَ پری

گونمن ءَ ساڑایگ نہ بیت ماھیں سومری

گُل گْوشئے زاناں گَچّھیں اِستیّنے زِری

گوں زباد بوئیں چندن ءَ کَے کنت ھمسری

سیر دِلی چاراں من ترا ھانؔل اِمبری

کہ نہ زاناں کائے کدیں کبگیں کوتری

پھر نہ بنداں من پہ تئی کولاں کاپری

پہ تئی اِکرار ءُ ھکیکتّاں دلبری

گیگ ءُ گْوم بوتاں کہ کناں ارزاں گُڈسری

کِسّھاں نوکیناں، جناں گپّاں بُندری

یک اناگہ گار بوت کپودر آ دْرم گْوری

گوں وت ءَ بُرت ئِے شھدی ءُ شکّل زیمری

دست جتگ کارے مشکل ءُ گْرانیں بے سری

گْور جتگ سوزمانے دل ءَ آس ءُ انگری

گُرتگ پہ جْوانی سوج ءُ سر مرداں پیسری

ریزمے واھگ گپت پہ چیر ءُ اندری

جور کنت مردانی دپ ءَ شیراں مادری

میر ءُ سرداراں رسین اِیت پہ چاکری

گپّ ھما شرّ اِنت کہ بکنت مردم زاھری

یات کناں لال ءِ ھاترءَ کولے اومرؔی

بے وسیں اُپاراں جناں نالاں نادری

مارگ ءَ اِش شرّ زاناں منی درد اَنت گُڈّسری

بِلّے گْوار اِیت گم موسمی ھور ءُ جمبری

ھمبلاں سھتے بند کناں گالاں مِھتری