اَرس

(۱)

دل گم ءَ چہ پُرّ بیت ءُ بے گُماں پِریات کنت

یات کَیت اِنت مھپری ھَر چُنت کہ امروز مُہ نہ دنت

من پہ اِے تُرس ءَ کہ کَسّے ھانؔل ءِ نام ءَ مہ گِپت

کم کناں پِریات ءُ آھاں، ارس ھولمب ءَ رِچ اَنت

آپ نہ اَنت ایشاں ھوار اَنت ھون ٹپّیگیں دل ءِ

گوں منی ارسان روچے تئی کلمپر ھور بنت

تو گْوشئے یکپارگی بند اِش بکن اِے چون بیت

گْریوگ ءِ ارس اَنت بازیں کندگ ءِ ارس اے نہ اَنت

بے وسان ءُ ھچّ توجیلّے نہ گنداں من سیؔد

اِشکُناں نام ءَ گُل ءِ، ءُ چمّ ارس ءَ پُرّ بنت

(۲)

اِے ارس تھنا گم ءِ کاسد ءُ نشان نہ اَنت

برے پہ بازیں گَل ءُ وژدلی ءَ ھم درکا اَنت

منی گم ءَ گوں وتی وژدلی ءَ ھور بکن

بیا بکند ھمنچو کہ ارس در بْیا اَنت

نہ اَنت نمب تْرپوکیں اِے تْرمپ اَنت اَرسانی

بْیا کہ باگچہ ءَ نازبو اِے گپّ ءَ اَنت

کُت ئِے چہ مُدّتے ءَ رند گونمن چار ھَبَر

گَلے چتوں بلے چاراں کہ اَرس رِچگ ءَ اَنت

(۳)

ھانؔل ءِ یات ءَ چو ھاری مَلّ اِتگ ارساں منی

کیلّگ ءُ رود ءُ تلاراں سر جَتگ ارساں منی

ٹیل ءُ کرپاسِیگ ءَ دل آس ءَ گم ءِ مانداشتگ اَت

توسگ ءَ بے آسریں جھدےکُتگ ارساں منی

تو گْوشئے روچ ایر شُت ءُ اِستار پدرا بوتگ اَنت

راہ گپتگ آ ءُ اِنگو دَور کُتگ ارساں منی

پہ وتی جیگ ءَ ءُ شار ءِ دامن ءَ شات اِت کنئے

پَتّو ھَکّ اِنت دیدگاں جاگہ دیگ ارساں منی

چہ دل ءَ ھون آپ بوت ءُ رِتک اَنت چمّانی رہ ءَ

من مِران ءُ شودگ ءِ گُم دُور کُتگ ارساں منی