گُل ءِ بانوری ءِ ھال اِش رسینتگ
پد ءَ اِے آزگیں ٹَپّ اِش کُدینتگ
مروچی گْراں گْور اِنت نازانی ھانؔل
من زاناں، دُژمنیں دوستاں سُرینتگ
زباد بُو آتکگ اَت واب ءَ منیگ ءَ
دگہ سازے منی کُلّ ئِے زَرینتگ
نَیتکئے گوں وتی شھدیں زبان ءَ
ھَمک شپ شیر ءُ شکّل پتّو مینتگ
ھبر سر بوتگ ماھیں دزگْوھاراں
پمیشکا پمّن ءَ مُورک اِش مُجینتگ
گُل ءِ یک زھر کَنکِّیں چارگے ءَ
کلم یکپارگی بھت ءِ نسینتگ
تو داتگ ھال دل پْروشیں من ءَ را
کلات گنجیں اُمیتانی ڈُرینتگ
دَمانے نْیا چہ کھریں ملکمیتّ ءَ
پہ کشّ ءُ ھُر جَنَگ ساھوں زِھینتگ
گنوک ءُ سرمچار ءُ مستیں واھگ
مزار بیمّیں منی مرگ ءَ گُڑینتگ
نہ بیت گندگ مروچاں پہ گدارے
ردیں ناسرپداں ”دوستی“ ھزینتگ
سیؔد گُشتگ پد ءَ چار گال مرچی
کہ بے گنجیں زھیراں دل کُدینتگ